دوردونجو حیسسه

 

        (10)

            قورغوشون  کیمی  آغیر  و  قاتی  بیر  قارانلیق  قاناد  گریب  سئمینارییانین  اوزه رینه  چوکموشدو . صینیف  اوتاقلاریندا  یانان  ایشیقلار  گئجه نین  قارانلیغینی  بوغا  بیلمیر ، سولغونلاشیب  پنجره لرده  اوله زییر ، دومان   آرخاسیندا ایمیش  کیمی  گوجله  گورونوردو . مکتبین  حیه تی  بومبوش  ایدی . پنجره لرده  تیتره شن  کولگه لرده ن  باشقا  سئمینارییانین  بیناسیندا  جانلی لیق  علامتی  یوخ ایدی . اینسانی  قورغوشون  کیمی  ازیب ، قوصصه  و  کده ره  قرق  ائده ن  بو  آغیر  سوکوتدان  آدامین  قولاغی  گویولده ییردی . آنجاق  پئتروو  هئچ نه یه  فیکیر  وئرمه ده ن  بیر  کابوس  کیمی  صینیف  اوتاقلاری نین  قاباغیندا  دولاشیردی . او  هر  شئیی  بیلمک ، هر  پیچیلتی نی  دینله مک  و  هر  سوزو  ائشیتمک  ایسته ییردی . او ، بودفه  عاده تی  خیلافینا  آیاغینی  یئره  آستاجا  باسیر  و  چالیشیردی کی،   چکمه لری  سسله نمه سین .

   

دوردونجو حیسسه

        (9)

      سئمیونوو  اوستونه  گوی  ماهوت  چکیلمیش  ایری  یازی  ماساسی نین  آرخاسیندان  دوروب  کونجده کی  ساعاتا  یاخینلاشدی . ژیلئتی نین  جیبینده ن  آچاری  چیخاردیب  قاپاغی  آچدی . آدام  بویدا  اولان  ساعاتین  ایری  کفگیری  عتاله تله  ساغا – سولا  حرکت  ائتدیکجه  اوتاغا  آهنگدار  بیر  چیققیلتی  یاییلیردی . سئمیونوو  آغ  سیفئربلاتین( ساعاتین یازیلی  صحیفه سی کی ، عقره بلر  اونون  اوزه رینده  دولانیر )   اوستونده کی  ناخیشلی  رقملره  ، قیزیل  سویونا  چکیلمیش  عقره بلره  باخدیقدان  سونرا  زنجیری  دارتدی . ائله بیل  ساعاتین  چیققیلتی سی  گوجله ندی . عقره بین  بویوک  تایی  اون بیرین  اوستونه  چاتدی . دیرئکتورون  اوتاغینا  هارداسا ، لاپ  اوزاقلاردا  چالینان  کیلسه  زنگی نین  سسینی  خاطیرلادان  بیر  دانقیلتی  یاییلدی . بو  سس  بیر  نئچه  دفه  تکرار  اولوب   دالغالاندی . سئمیونوو  عاده تی  اوزره   جیبینده ن  گوموش  ساعاتینی  چیخاردیب  شاققیلتی ایله  قاپاغینی  آچدی  و  واختی  یوخلادی . دالبادال  وورولان  زنگین  دالغالی  صداسی  سوسانا  قده ر  گوزونو  عقره بلرده ن  چکمه دی . دوز  اون بیر  تامامدا  هر ایکی  ساعاتین  قاپاغینی  اورتدو  و  آستا  آددیملارلا  ائیوانا  چیخدی .  

    

دوردونجو حیسسه

          (8)

      اشرف  یوخودان  آییلان  کیمی  الینی  سینه سی نین  اوستونه  آپاردی . کیتابی  تاپمادیقدا یورغانی آتیب  یئرینده ن  سیچرادی . یاستیغی  قالدیردی ، دوشه یین  آلتینی  یوخلادی ، گوزونه  هئچ نه  دیمه دی . رنگی  کاغیذ  کیمی  آغاردی . چارپایی نین  دورد  یانینا  فیرلاندی ، اییلیب  آشاغی  باخدی ، پنجره نین  قاباغینی  آختاردی . (( بو نئجه  اولا  بیلر ؟ )) – دئیه  دوشوندو . یولداشلارینی  اویاتماق ، اونلاردان  بیر – بیر  کیتاب  گوروب – گورمه دیکلرینی  سوروشماق  ایسته دی .  آنجاق  اوره ک  ائتمه دی . آخی  بو  کیتابی  اونا  گیزلینجه  وئرمیشدیلر ، اوزونه ده  تاپشیرمیشدیلار کی ، هئچ  کسه  گوسترمه سین .

 

دوردونجو حیسسه

 

       (7)

       آلئکسئی  اوسیپوویچ  چایینی  تزه له ییب  یئنی ده ن  دفترلری وره قله دی . الینه  عوثمانین  یازیسی  کئچدی . سرلووحه نی  اوخویان  کیمی  جیددی له شدی . چایدان  بیر- ایکی  قورتوم  ایچیب ، ایسته کانی  نلبه کی یه  قویدو . قلمی  قیرمیزی  موره ککبه  باتیردی . اینشا  یازی سینی  تکراره ن ، دیققتله  اوخوماغا  باشلادی . (( منیم  آنادان  اولدوغوم "گوی تپه" کندی  "کور"ون  ساحیلینده  یئرله شمیشدیر . اطرافی  اوجا   تپه لرله  اَحاطه  اولونموشدور . بیزیم  اَکین ساحه لری نین  بیر  اوجو  ائرمنی  کندلرینه  قده ر  اوزانیب  گئدیر . قرب  طرفیمیز  ایسه  "گورجوستان" تورپاغی ایله  هم سرحددیر . "کور"ون  حیرصلی  لپه لری آز  قالیر کی ، ائولرین  دیوارینی  یالاسین . سول  ساحیلده  بویوک  بیر  مئشه  وار . بو  مئشه  "کور"ون  یاخاسی  بویو  اوزانیب  اوفوقلره  قده ر  گئدیر . بورا دا  هرنه   دئه سن  تاپماق  مومکون دور . کند  اوشاقلاری  چوخ   واخت   اوزه – اوزه  "کور"و  آدلاییب   مئشه یه  کئچیر ، آلمادان ، آرموددان  دَریر ، توت   یئییر ، جیب لری نی  آلچا ایله  دولدوروب  گئری  قاییدیرلار . بیزیم  مئشه ده  یوزایللیک   پالید ، فیستیق  و  قارا آغاجا  دا  راست  گلمک  مومکون دور . بورانین  هله  آیاق  دییب  ایز  دوشمه میش  قالین  یئرلری  وار . هر  آخشام – سحر  تالالاردا  قیرقووول  قاققیلداییر ، مئشه  خوروزلاری  بانلاشیر . بورا  صفالی  و  زنگین  اوو  یئری دیر . قیشدا  قازین ، اورده یین ، یایدا ، پاییزدا  ایسه  توراجین  الینده ن  ترپه نمک  اولمور . قابانلار سورو ایله دیر ، بوز  آیی لارا ، جاناوارا ، تولکویه  هر  آددیم باشی  راست  گلمک  مومکوندور .

دوردونجو حیسسه

            (6)

      جاهاندارآغا  آتی  تووله ده ن  چیخاردیب  تالوارین  آلتینا  گتیردی . ساغریسینی ، یالینی  سیغاللادی . آت  آستادان  اوخرانیب  کیشی نی  اییله دی ، قولاقلارینی  قیرپیب  دایاندی . جاهاندارآغا  درینده ن  کوکسونو  اوتوردو  و  یه هری  آتین  بئلینه  قویدو . قارین آلتی  قاییشلارینی  موحکم  چکدی ، یویه نی  یوخلادی ، دال طرفه  کئچیب  آتین  قویروغونو  دویدو . آت  پیس آتا  اوخشامیردی . بویو  گوزه ل ، قامتی  اوجا ایدی . دریسی نین  رنگی  توند قیرمیزی ایدی . بعضی  یئرلری  شابالیدی  رنگه  چالیردی . قاچماغی دا  پیس  دئییلدی ، آنجاق  جاهاندارآغا نین  اوره یینه  او قده ر ده  یاتمیردی . نه قده ر  چالیشیردی سا دا ، قمر ده ن  سونرا  بو  آتا  ایسی نیشه  بیلمیردی  .  ائله بیل  آتدا  بو  سویوقلوغو  دویوردو  .  صاحیبی نی  گوره نده  قمر کیمی  چه چیی ایله  یئری  ائشیب  کیشنه میر ، شاها  قالخیب  اویناقلامیردی . بو  آتلا  قمری  موقاییسه  ائتمک  اولمازدی . قمر  ائله  بیل  دیل  باشا  دوشوردو ، سئوینجینی ، کده رینی بیلدیریر ، لال  باخیشلاری ایله  صاحیبی نین  اوره یینده ن کئچنلری  اوخوماق  ایسته ییردی .

     

دوردونجو حیسسه

       (5)

      اونلار  درین  سوکوت  ایچینده ، آستا  آددیملارلا   قدیم  " قوری"  قالاسی نین  یئرله شدیی  تپه یه  یوللاندیلار . جیغیرلاری  اوت  باسمیشدی . بعضی  یئرلرده  قالانین  دیواریندان  یووارلانیب  دوشن  داشلار  یولو  کسمیشدی . کیپیانی  آزاجیق  آخسادیغیندان  دالدا  قالیر ، بیر آز  ایره لی ده  گئده ن  احمد  تئز – تئز  دایانیب  اونو  گوزله مه لی  اولوردو . نهایت ، قالا  دیوارینا  یاخین  بیر  یئرده ، اوتلاری  آزاجیق  سارالمیش  گویلوکده  اوتوردولار . کیپیانی  درحال  پئنجه یینی  چیخاردیب  یئره  آتدی  و  آرخاسی    اوسته    اوزاندی  .  احمد   ایسه  گوزونو  اوفوقه  زیلله دی .   

     قارشی داکی  داغلار  باش – باشا  وئرمیشدی . مئشه نین  اته کلرینده  کندلر ، بیر آز  بری ده  ایسه  واغزال  گورونوردو . "گوی تپه" نین  یانیندا  بورولغانلی  و  حیککه لی  اولان "کور " بورادا  قوزو  کیمی  ساکیت ایدی .   

دوردونجو حیسسه

                                              (4)

       اوشاقلار  و  اولگا  کونستانتینوونا  قونشو  اوتاقدا  یاتدیقدان  سونرا ، سئمیونوو  یازی  ماساسی نین آرخاسینا کئچدی .شالواری نین یان جیبی نده ن تمیز  بیر  دسمال  چیخارتدی . عئینه یینی نین  شوشه لرینی  سیلدی  و  پولیسین  دونن  گئجه  گتیردیی  مکتوبو  شامین  ایشیقیندا  تزه ده ن  دیققتله  اوخودو . سون  سطیرلرین  اوزه رینده  خئیلی  دایاندی . (( کیپیانی نین  نه لر  دوشوندویونو  اویره نیب  بیزه  گیزلینجه  خبر  وئره سینیز )) . مکتوبو  کنارا  آتدی .       (( گور نه قده ر  حیاسیزلاشیب لار ! اینسانین  نه لر  فیکیرله شدیی نی ، اونون  تفککور  طرزینی  بئله  نظاره ت  آلتینا  ساخلاماق  ایسته ییرلر . آداملاری  سربست  دوشونمک  حقوقوندان  دا  محروم ائتمه یه چالیشیرلار .  آز  قالیرلار      اوره کلره  بئله  خفییه لر  گونده رسینلر )) . او  بیر آنلیغا کیپیانی نین حرکتلرینی گوزو قاباغینا گتیردی . سئمینارییادا ایشله- دیی  مودده تده  هله  اوندان  بیر  شیکایت  اولمامیشدی . کیپیانی نی  یالنیز  گورجولر دئییل ، بوتون  شوعبه لرین  طلبه لری سئویردی .

دوردونجو حیسسه

  (3)

      آلئکسئی اوسیپوویچ  یاستیغا  دیرسه کلنه ره ک قونشو چارپایا دا شیرین یوخویا گئتمیش آروادینا  تاماشا  ائدیردی . وئرا  الی نین ایکیسی نی ده جوتله ییب باشی نین آلتینا  قویموش ، دیزلرینی  قارنینا  دوغرو  آزاجیق  قاتلاییب  یاتمیشدی . یورغان  سوروشوب  دوشدویونده ن ، چیینی نین  بیر  حیسسه سی  و سینه سی  آچیلمیشدی . نفه سی  ایپک  کوینه یی نین  یاخاسینداکی  تورو  یئلله ندیریردی . چیراغین  ایشیغی  آشاغی  چکیلمیش  اولسادا ، آروادین  ساچلارینا  دوشن  دَن  آیدینجا  گورونوردو . قیریشلار  اونون  آلنی نا  ایز  سالمیشدی . گوزلری نین  آلتی  کولگه له نمیش ، بوخاغیندا ، سینه سینده  نازیک  زئه لر  عمله  گلمیشدی . حال بوکی  بئش – آلتی  ایل  بوندان  اوول  یاناغی ، بوخاغی ، ائله  سینه سی ده  قشنگ  و  سیغاللی ایدی . ساچلاری  گور  و  دالغالی ایدی . کوکسو  قاباریق  اولسادا ، بده نی  نازیک  و  اویناق ایدی . حرکتلری  چئویک ، یئریشی  قوش  کیمی  یونگول ایدی .آنجاق  ایندی  اَته  دولوب آغیرلاشمیشدی . حیسس  اولونوردو کی ، وئرا  یاش لاشمیشدیر .

      اونلار  اون  ایلده ن  چوخ ایدی کی ، ائوله نمیشدیلر . چتین  گونلرده ، بیر – بیرینه  حَیان  اولموش ، ائوده  بیر  آزجا  سویوقلوق  حیسس  ائده نده  نفسلری ایله  اونو  ایسیتمیش ، قریب لی یه  دوشه نده بیر – بیرینه  سیغینمیشدیلار.

دوردونجو حیسسه

  (2)                                                                                 

 داملارین و چارداقلارین اوستونده آخشامدان  تزه ک  یاندیرمیشدیلار . گئجه ده ن  خئیلی  کئچمه سینه  باخمایاراق ، هاوا  دورغون  اولدوغوندان  کثیف  توستو  لایلاری  کندین  اوستونه  چوکموشدو . بیر  یارپاق ، بیر  اوت  بئله ترپه نمیردی .آغجاقاناد  سوروسونون  ویزیلتیسی  بیر – بیرینه  قاریشیب  کنده زوو توتوردو . هر شئی سوسموشدو . آناسی  عوثمانا  آخشامدان  دامین  اوستونده  یئر سالمیشدی . او ، یاتیب  یوخویا  قالماماق اوچون تئزده ن  یورغان –  دوشه یه  گیرمیشدی ، آنجاق  گوزونه  یوخو  گئتمیردی .  

   مینا خالا  اوغلونون  یانیندا  اوتورموشدو . آرواد  عوثمانین  کوینه یینی  دیزی نین  اوستونه  قویوب  یاماییردی . دوز  اوچ گون  هر  یئری  گزمیش ، قونوم – قونشویا  آغیز  آچمیش ، حتتا  شه هره  گئده نلره  یالوارمیشدی کی، اونا  بئش – آلتی  مئتر  پارچا  آلسینلار ، سونرا  الینه  پول  دوشن  کیمی  بورجو  قایتارار . اونا  ال  توتان  اولمامیشدی  . آرواددا  هر  یئرده ن   علاجی  کسیلدیی نده ن ، اوغلوندان  خلوه ت  قاپیلارینداکی  یئگانه  خوروزو  توتموش ، قونشو  کندده کی  دوکانا  گئدیب  پارچا  ایسته میشدی . دوکانچی  بیر  آرشیندان  آرتیق  پارچا  وئره  بیلمه یه جه یینی    سویله دیکده  ایسه ، (( کسه رم ،  اوشاغیم  یئیه ر )) .- دئمیش  و  بیر باش  ائوه  قاییتمیشدی . او ، اوغلونون  اَینینی تزه له مه یه  چالیشمیش ، یولداشلاری نین  یانیندا  عوثمانین  اوتانماسینی  ایسته مه میشدی . ایسته میشدی کی ، عوثمان  قریب  یئره  اوره یی  سینیق ، اَینی  چیلپاق  گئتمه سین . آنجاق  نه  ائده سن کی ، یوخدان  آللاه دا  بئزاردیر .

دوردونجو حیسسه

      (1)

           آخشام  قارانلیغی  قاتی  بیر  کولگه  کیمی  "قوری"نین  اوزه رینه  چوکموشدو . یاریمجا  ساعات  بوندان  اوول  زیروه سینده  گونه شین  سون  ساریلیغلارینی  عکس  ائتدیره ن  داغلار  بویون – بویونا  وئریب  مورگوله ییردی . بورانین  طبیعه تی  شیمالا  بنزه میردی ، نه  بیاض  گئجه لر ، نه ده  اوزون  سوره ن  یای  آخشاملاری  وار ایدی .      بیرده ن – بیره  زیل  قارانلیق  چوکور ، بیرده ن – بیره ده دان  یئرینده  شَفَقلر اویناشیردی .

      سئمیونوو  آرتیق  بونلارا  وردیش  ائتمیشدی . اووللر  "پئتئربورگ"ون  بیاض  گئجه لرینه  وورغون  اولان  دیمیتری  دیمیتری یه ویچ  ایندی ده  جَنوب  آخشاملارینا  مفتونلوق  گوسته ریردی . او  هر  آخشام  پنجره  قاباغیندا  دایانیب  قوروبا  تاماشا  ائتمه یی  سئویردی . بو گون ده  عاده تی  اوزره  همیشه کی  یئرینده  دوروب  اوفوقه  باخیردی ،           باغ – باغات  ایچینده  ایته ن  " قوری"نین  کیچیک  داخمالاریندا  یانان  چیراقلار  قارانلیقدا  پاریلدایان  یارپیز  قوردلاری  کیمی  ایشیلداییردی .

           سئمیونوو  اللرینی  سینه سینده  چارپازلاییب  شه هرین کناریندا " کور"له  قوجاقلاشان  " لییاخو" – ا (liyaxv) چای نین  قیژیلتی سینا  قولاق  آسیردی . پنجره ده ن  ایچری  دولان  خفیف  کولک  اونون  آغارماقدا  اولان  ساچینی  اویاندیریر ، چنه سی نین  آشاغی سیندا  هاچالانمیش  توپا  ساققالی نین  یومشاق  توکلری  آراسیندا  دولانیردی . او  طرفده ، داغلارین  اته یینده  یئرله شن  بالاجا  دمیریولو  واغزالی نین  سولغون  ایشیقلاری  گورونوردو . قاتارلار  اوتدوکجه  تکرلر  یئکنه سقلیکله  تاققیلداییر ، پاراووزلار  کسیک – کسیک  فیت  وئریردی .